[بومشارى]

اهدي هذة الابيات الى الاخ على الميع



يقولون ما للعبد بد عن المقســــــــــــــــــــ ــــــــوم
وأنا أقول صح ويقنع العبد مقسومـــــــــه


عسى الله يعين اللي توافد عليه إهمـــــــــــــــــوم
هموم تخلي طبلة الراس منجومـــــــــــــه


ترى والله انه مايكدر عليك النــــــــــــــــــــــ ــــوم
سوى كلمة من بعض الاصحاب مسمومه


إليا جت من الغالين وإلا الرخوم رخـــــــــــــــوم
ولا أمحق من الغالي إليا شانت علومـــه


ضعاف الروابع تبتلش والقروم تشـــــــــــــــــوم
ولاهي بلا شيمة ٍ من الشيم مليومــــــــــــه


ولا أزين من القاع الخلى والوجيه سلـــــــــــوم
ولا رفقة بعد طول الايام ملغومـــــــــــــــه


ولا ألذ من عشرة شريف من أقصى القــــــوم
يبادلك فعل الطيب معناه وسلومـــــــــــــه


ولا شفت في جو الصداقه غبش وغيــــــــــــوم
عطيت الدروب اللي مع الارض مرسومـه


ولا مثل عز النفس لو مامعك مطعـــــــــــــــوم
وعن أهل الشماته خل الاسرار مكتومــه


معي لو سمحت شوي عقب عداك اللـــــــــــوم
أبعطيك عن بعض الرجاجيل معلومـــــــه


ترى اللاش لو وقف معك في حياته يـــــــــــوم
تشوف الردى متبين فيه من يومـــــــــــه


وأنا أقول لو إن في وجيه الرخوم وســـــــــوم
عرفنا نميز قيمة النذل بوسومــــــــــــــه


علشان نجلس مع رجال الوفى و نقــــــــــــوم
ونبعد من اللي عند الاجواد مذمومـــــــــه


وأنا أسمع مع أهل التجربة في الحياة علوم
بعضها صحيح وبعض الاخبار موهومـه


يقولون وكر الحر ما يعتليه البــــــــــــــــــوم
وأنا شوف عيني وكر حر تحت بومــــه

[محمد الفزير]

صح لسانك يستاهل بو عبدالله علي الميع اكثر قليل اللي ينقال فيه رجل معدنه نظيف عجزو الرديين يغيرونه رجل حفظ الاتحاد من اول يوم مسكه ولا عمره عطاهم فرصه الله يوفقك يا بو عبدالله
موفق بإذن الله ... لك مني أجمل تحية .

[فيصل العسكر]

السلام عليكم ورحمة الله وبركاته


بيض الله وجهك يابو مشاري قصيدة فيها معنى قوي وبيوت جزله

ويستاهل أبو عبدالله كل خير رجل بمعنى الكلمه وماأنسى وقفته معانا في أنشاء نادي الصليبخات تحت مظلة الأتحاد الكويتي وبيض الله وجهك ياعلي الميع رجل المواقف الصعبه

[عدنان الكليب]

جبل مايهزك ريح يالبوعبيد افعالك معروفة انقلت كلمه ماتنزل القاع
يستاهل الميع وهو حر ابن حر

[captain]

يستاهل أبو عبدالله رجل يستاهل الطيب

[Thamer Rashed]

صح لسانك يابو مشاري

والنعم بعلي الميع وعزوته كلها

[بدر السنافي]

السلام عليكم ورحمة الله وبركاته
صح السانك يابومشاري ما عليك زود والاخ علي الميع هذا قليل
بحقة رجل الصعاب ولا السهلات ماهو لها رجل قول وفعل يستاهل
بوعبدالله اللة يسلمة للاتحاد وعزوتة ما تخلية وحنا لها وقدها

[بودستور]

بسم الله الرحمن الرحيم
السلام عليكم ورحمة الله وبركاته
يستاهل بوعبدالله كل خير رجل اداري وقيادي ناجح
موفق يابوعبدالله باذن الله

[ahmad saad]

السلام عليكم ورحمة الله وبركاته
ماشاء الله أشعار بالمنتدى الله يوفق الجميع ان شاء الله
شـكــ وبارك الله فيك ـــرا لك ... لك مني أجمل تحية .

[أبو عصام]

صح لسانك يابومشاري يستاهل بو عبد الله (علي الميع) وعلى رأي المثل يا جبل ما يهزك ريح وبو عبد الله فعلا جبل بل صخرة الاتحاد والدنموا المحرك لا يمل ولا يكل وهو من أكثر من طوروا في الهواية له باع طويل في تطويل الهواية في الكويت وليس الكويت فقط بل بالخليج كله تسلم يمينك بو مشاري